Tageswanderung Engelberg - Brunnisalp (Goldys)

-Ilse Weyeneth- E chli früeh, am viertu vor achti, hei mir üs am Bahnhof troffe. Es si 14 Goldys gsi, wo sich di Wanderig nid hei wöue la entgah.Wi bi der SBB üeblech, hei mir als Gruppe bis z’hinderscht vom Zug müesse schuene, um i dä für üs reservierte Wage iizschtige u Richtig Luzärn z’fahre. Alli si gueter Luune gsi; es isch sunnigs u warms Wätter vorus gseit gsi. Nachdäm dass es em Lutsprächer gheisse het, sie danke fürds Verständnis für d’Verspätig, si mir im Sackbahnhof vo Luzärn wider losgschuenet uf d’Zentralbahn Richtig Ängubärg. Uf däre Strecki het d’Reservation vo dr Margrit nume bedingt gnützt. Es isch eifach e Wage für Gsellschafte agschribe gsi. Da heimer üs haut e chli müesse wehre gäge di grossi Mängi vo Asiate wo ufem Wäg zum Titlis gsi si. Aber schlussändlech heimer alli es Plätzli gfunde u hei chönne d’Fahrt gniesse a de Blueme u Matte verbi, wo si flissig am Heue gsi si.

Ds Ängubärg hei mir üs zersch mit emene Gaffee im Kaufkaffeelade vis-à-vis vom Bahnhof müesse aklimatisiere. Dr  Bus het  üs  nachhär  zur  Talstation vo dr Schwäbebahn uf d‘Brunnisalpgfüert.  Obe-n-acho  hei  mir  üs  trennt. D’Elisabeth,d’Ursula uigsiwiter mit em Sässelilift zum Härzlisee gfahre. Di andere si dr steil Wäg z’düruf gloffe. Ds Personal vom Sässellift isch sehr zuvorkommend gsi u het der Lift aghaute, damit di 3 Grazie hei chönne i u usstige. D’Elisabeth u ig si no chli z’düruf gloffe u hei di schöne Bärgmatte bewunderet u d’Ussicht gnosse. E paar Gleitschirmflüger hei ou vo däm schöne Wätter u Wind profitiertu si über ds Gländ gleitet. D’Ursula het inzwüsche Tische u Bänk reserviert u em ganze Betrieb vo de Schuelklasse zuegluegt. Me het chönne i de Felse chlättere, es Füürli mache zum Picnic oder übere Kitzelpfad ume Härzlisee loufe. Das Barfuesserläbnis uf em Kitzelpfad hei sich natürlech ou es paari vo üs nid wöue la entgah u hei nach em Picnic, inklusive Glace zum Dessert, d’Schueh und Socke  abzoge u  di  10  Poschte,  wie-n-es  im  Prospäkt  gstande-n-isch, under d’Füess gno. Das isch sicher es speziells Erläbnis gsi.

Dermit isch Zyt vergange u mir hei müesse ufbräche u wider Richtig Tal ga. Ig bi de mit de Wanderer am gäbige Wäg nache u d’Ursula het de Unterstützig vo dr Theres übercho für mit em Sässellift wider zur Bärgstation Brunni z’fahre. Es isch gäbig gange zum Wandere, immer hets wider es Lüftli gha oder d’Sunne het sich churz hindere Wulke versteckt, so dass me nid z’starch i ds Schwitze cho isch. Es sige ja gemäss Überliferige Ängle, wo i Form vo Wulke über und um d’Bärge striche!

Dr Zytplan het üs erloubt ds Ängubärg no einisch i ds gliche Gaffeehus wie am Morge, mit dr üsserscht fründliche Särvierttochter, z’ga u no je nach Luscht dr Durscht z’lösche. Uf em Heiwäg hets, immer vo dr Margrit bschtellt, die entsprächende reservierte Plätz gha. Natürlech isch flissig brichtet worde u scho gli hei mir z’Luzärn wider zügig dr Zug gwächslet u si no di letschti Etappe mit dr SBB gfahre. Öppe am Sibni si mir ds Bärn acho, umene gfreute Tag richer. Dr Margrit möchte mir viu mau danke für di gueti Organisation u dr prima Wätterreservation bim Petrusl.